E ardhmja e celularëve të Motorola-s në pikëpyetje

E ardhmja e celularëve të Motorola-s në pikëpyetje

Të gjithë jemi mësuar të mendojmë për Motorolan si njërin prej
gjigantëve të industrisë së telefonave celularë, mirëpo puna është se,
njësia e Motorolas për prodhimin e telefonave celularë, nga njëri
tremujor në tjetrin, po sharron në humbje. Andaj mundësia e ndarjes së
kësaj njësie në kompani të veçantë, e madje edhe shitja e saj, po bëhet
gjithnjë e më të mundur.
Aktualisht, në maje të piramidës së industrisë së telefonave celularë
është Nokia, e përcjellë nga Samsung e Motorola. Mirëpo nganjëherë
pozita e mirë në treg nuk nënkupton edhe përfitim; pos kësaj,
pjesëmarrja e Motorolas në treg është në rënie për një periudhë të
gjatë. Kështu, gjatë vitit 2007 Motorola ka regjistruar humbje prej 1.2
miliardë dollarësh, në krahasim me fitimin prej 2.7 miliardë dollarësh,
në vitin 2006.

Për këtë shkak, kompania ka paralajmëruar se është duke menduar për
ristrukturimin dhe ndarjen e njësisë për prodhimin e celularëve. Një
nga iniciatorët e idesë është multimiliarderi, Carl Icahn, që ka 3.3
për qind të aksioneve në Motorola, i cili ka deklaruar se është i
kënaqur për faktin se, Motorola përfundimisht po mendon për një mundësi
të tillë.

Derisa bordi udhëheqës nuk vërteton se Motorola do të fillojë me të
vërtetë ristrukturimin, asgjë nuk është e sigurt - mirëpo nuk do të
donim të shihnim këtë njësi të Motorolas, të përfundojë si ajo e
Siemensit, që dështoi më herët.