Turqit mbesin pa YouTube

Turqit mbesin pa YouTube





Gjykata turke ua ka ndaluar turqve qasjen në shërbimin YouTube,
sepse aty janë paraqitur video incizime të cilat fyejnë Mustafa Kemal
Ataturkun, babanë e Turqisë. Kjo është hera e dytë që Turqia ka bërë
një lëvizje të tillë.
Në Turqi është e paligjshme të fyhet Ataturku, portreti i të cilit
varet në të gjitha zyrat qeveritare edhe pse kanë kaluar pothuajse 70
vjet nga vdekja e tij.

Shfrytëzuesit të cilët kanë dashur t’i qasen YouTube-it i ka pritur
lajmërimi në gjuhën angleze dhe turke mbi vendimin e gjykatës, sipas të
cilit YouTube është ndaluar që nga 17 janari.

Sipas mediave turke, në YouTube po zhvillohet luftë virtuale në mes të
Turqisë dhe Greqisë, ndërsa arsyeja e ndalesës së tij ka qenë një
video-material në të cilin paraqiten Ataturku dhe turqit si
homoseksualë. Videoja fyese dhe reagimet ndaj saj janë larguar nga
YouTube.

Marsin e kaluar YouTube ka qenë i bllokuar për dy ditë në Turqi,
gjithashtu për shkak të incizimeve të cilat kishin fyer Ataturkun. Pas
fshirjes së incizimeve kontestuese, turqit kanë mundur që sërish të
kenë qasje në YouTube. Kësaj radhe nuk është e qartë sa do të vazhdojë
kjo ndalesë.

Turqia nuk është vendi i vetëm e cila e ka bllokuar shërbimin YouTube.
Vitin e kaluar, qeveria tajlandeze ka bllokuar qasjen në këtë faqe për
katër muaj rresht, për shkak të incizimeve të cilat kishin fyer mbretin
tajlandez, Bhumibol Adulyadej.

Në maj të vitit të kaluar marokenët nuk kanë mundur të kenë qasje në
YouTube pasi që disa shfrytëzues kishin vendosur një video incizim i
cili kritikon mënyrën se si Maroko trajton banorët e Saharës
Perëndimore. Arsyetimi zyrtar i mospasjes qasje në këtë shërbim ka qenë
- problemet teknike, por nuk është sqaruar natyra e tyre, e as fakti që
këto telashe teknike e kishin prekur vetëm YouTube.